এম পি সি সিনা কুম্বিদা নোংমগী ওইবা পোলিটিকেল কনফরেন্স পাঙথোকখ্রে

ঙরাং কুম্বি এসেমব্লী কন্সটিট্যুয়ন্সিগী মনূঙচন্না লৈরিবা ঈবূধৌ সন্থোং হরাওথেল লাইবুংদা মনিপুর প্রদেশ কংগ্ৰেস কম্মিটি (এম পি সি সী) গী নোংমগী ওইবা পোলিটিকেল কনফরেন্স অমা পাঙথোকখ্রে।
কুম্বি কেন্দ্রদা কংগ্ৰেস কি মীরেপ অমা ওইনা মীখল থেংগদৌরিবা দা.খাঙেম্বম রোমেশকা খূৎশম্নদুনা পাঙথোকখিবা পোলিটিকেল কনফরেন্স অদূদা ইন্নর মনিপুর পার্লিয়ামেন্টরি কন্সটিট্যুয়েন্সিগী লোক সভা এম পি দা.অঙোমচা বিমোল অকোয়জমসু শরূক য়াখি। কনফরেন্স অদূদা শরূক য়াখিবা কংগ্ৰেস পার্টীগী অতৈ মশক নাইবা লুচিংবশিংগী মনুংদা খূন্দ্রাকপম কেন্দ্রগী এম এল এসু ওইরিবা, এম পি সি সীগী ঈলেক্সন কেম্পেন কম্মিটিগী চ্যেরমেন থোকচোম লোকেশ্বর, নম্বোল কেন্দ্রগী হান্নগী এম এল এ নামৈরাকপম লোকেন, হীয়াংলম কেন্দ্রগী হান্নগী এম এল এ ইলাংবম দিজমনি, এম পি ৱাই সি গী হান্নগী প্রসিদেন্ট নিংথৌজম পোপিলালসু মরূওইবা মীথূঙশিং ওইনা শরুক য়াখি।
কুম্বি কেন্দ্রদা হন্দক কংগ্ৰেসকি মীরেপ অমা ওইগদৌরিবা দা. খাঙেম্বম রোমেসনা মনিপুর মীয়াম অমদি কুম্বি কেন্দ্রগী মীয়ামগীদমক কত্থোকপগা লোয়ননা মমাঙদগী হৌনা চাওখৎ-থৌরাংগী থবক থবক-থৌরম কয়া তৌদুনা লাক্লি, মহাক য়াম্না মতীক চাবা, লাইরিক-লাইশু নীংথীনা খঙ-হৈরবা মীশক অমা ওইবগী মথক্তা মীয়ামগী থবক তৌরগা পেঞ্জবা, হৈনজবা মীওই অমনি, মীয়ামগী মীহূৎ অমা ওইবদা মতীক চারবা কেন্দিদেট অমনি। মীয়াম্না মহাকপু কেন্দ্র অদূগী মীহূৎ অমা ওইহনবি‌য়ু হায়বা ৱাফম এম পি দা.বিমোলনা থৌরমদুদা ফোঙদোকখি।
মতীক চাদবা মীওইশিংদা মীয়াম্না শেল খরগী য়েংলগা ভোৎ পীদুনা মীহূৎ ওইহনখ্রবদি মশাগী চঙখিবা শেল হান্না হঞ্জিন্ননবা হোৎনরিঙৈদা মীয়ামগী য়াইফা-থৌরাংগী থবক তৌবা ঙম্লোই হায়না দা.বিমোলনা ফোঙদোকখি।