মনিপুর পূম্বদা সনাজাউবগী জে এ সিনা কৌখিবা পূঙ ২৪ গী জেনরেল ষ্ট্রাইক্না মীয়ামগী মহৌশাগী পুন্সিদা চাউনা চৈথেঙ পীখ্রে

হন্দক চৎলিবা এপ্রিল থা অসীগী ১৩ দা জুদিসিয়েল কষ্টদিদা য়াম্না চিংননিঙায় ওইবা মওংদা লৈখিদ্রবা, ইম্ফাল ইষ্ট দিষ্ট্রিক্ট কি খুরায় নিংথৌবুং লৈকায়দগী খোইস্নাম সনাজাউবা এলাইজ ইবুঙো মীশীগী মতাঙদা শেমখিবা জোইন্ট এক্সন কম্মিটি এগেন্স দি কষ্টদিয়েল দেথ ওফ খোইস্নাম সনাজাউবা এলাইজ ইবুঙোনা হৌখিবা এপ্রিল ২৪ অমসুং ২৫ গী লোন্নবা অহীঙদগী কৌখিবা পূঙ ২৪ গী জেনরেল ষ্ট্রাইক্না মনিপুর মীয়ামগী মহৌশাগী পুন্সিদা চাউনা অকায়বা পীখ্রে। জেনরেল ষ্ট্রাইক অসীনা মরম ওইদুনা ইম্ফালগী মনূঙ অমসুং অকোয়বা মফমশিংদা কৈথেল, দুকানশিং অমসুং অতৈ ইষ্টাব্লিসমেন্ট পূম্নমক খুন্তাক-লান্সিবগী ফীভম মায়োক্নখি। ইদুকেস্নেল ইন্সটিট্যুটশিং য়াওনা ইম্ফাল ইষ্ট দিষ্ট্রিক্টকি মফমশিংদা মহৌশাগী পুন্সিদা চাউনা চৈথেঙ পীখ্রে।

খূরায় কেন্দ্রদদি মীওই অমত্তা য়ূমদগী মপান্দা থোক্নরক্তবদগী লম্বী-শোরোক্তা খুন্তাক-লান্সিবগী ফীভম উবা ফংখি। পেসেঞ্জর গারিশিং য়াওনা মখল অমত্তগী গারিশিং চেনখিদ্রে। পনবা য়াই, খূরায় নিংথৌবুং লৈকায়দগী খোইস্নাম সনাজাউবা এলাইজ ইবুঙো(২৭) অপোকপা কে ঐচ গান্ধি অসী হৌখিবা মার্চ ৩১ দা অতোপ্পা নহা ৪ গা লোয়ননা মনিপুর পুলিস কম্মান্দোশিংনা ফাখ্রবা মতূঙদা কোর্ট তা পুথোকখিবনি। মদূগী মতূঙদা মহাকপু এপ্রিল ১০ ফাওবা জুদিসিয়েল কষ্টদিদা রিমান্দ লৌদুনা লৈরকখ্রবা মতূঙদা অমুকসু মশা ঙম্লক্ট্রে হায়দুনা ইম্ফাল ইষ্ট দিষ্ট্রিক্টকি পোরোম্পাৎতা লৈরিবা জেনিমস হোস্পিটালদা পুখত্তুনা লায়কন্নরিঙৈদা লৈখিদবনি।

কুকি- নার্কো টেরোরিষ্টশিংনা চত্থরকপা লান ঙাক্ননবা, মীয়ামগী পুন্সি অমসুং লন-থুম ঙাক্ননবা ভিল্লেজ ভল্লন্টিয়র ওইনা লৈরম্বা নহা অসিবু পুলিস কম্মান্দোশিংনা ফাখ্রবা মতূঙদা অশীবা হকচাং ওইনা ফংবা হায়বসি য়ানিংদবা ফোঙদোক্তুনা হৌখিবা এপ্রিল ১৭ তা খূরায় লম্লোঙদা মীয়ামগী মীফম পাঙথোক্লবা মতূঙদা মেমোরেন্দম অমা থবক ওইনা পাঙথোকপিননবা গভর্নরদা পীশীনখ্রবসু থওইনা তাবীরক্তবদগী খোয়শাওনরবা জে এ সি অমসুং মীয়াম্না ষ্ট্রাইক অসী কৌখিবনি।