মনিপুরদা পি আর থা তরুক শাংদোকপগী ৱাফম রাজ্য সভানা অয়াবা পীখ্রে

মনিপুরদা হৌজিক থমজিল্লিবা প্রসিদেন্ট রুল অসী মখাতানা থা তরুক শাংদোক্ননবা হৌজিক চত্থরিবা পারলিয়ামেন্টকি নোংজু মীফম অসীগী মনূঙ, হৌখিবা নুমিৎ খরনিগী মমাঙদা লোক সভাদা পাস তৌখ্রবা মতূঙদা ঙরাং রাজ্য সভানা মখাতানা ভোইস ভোট্টা পাস তৌখ্রে। ফীভম অসী য়ৌরক্লবনিনা মনিপুরদা প্রসিদেন্ট রুল অসী লাক্লিবা থা ৬ তি মখা শাংথনা চৎনরগনি হায়বগী চপচাবা থাজবা লৈরি। লোক সভা অমসুং রাজ্য সভানা পাস তৌরকখ্রবনিনা ইন্দিয়াগী প্রসিদেন্টনসু অদুম্মক এসেন্ট পীরক্লগনি হায়বসিনি। মহাক্কি এসেন্ট পীরক্লবা মতূঙদগীদি পি আরগী মখাতাবা থবক-থৌরম পূম্নমক লৌখৎলক্তুনা মনিপুরগী গভর্নরনা ওভরওল সুপ্রিম পৱার পায়দুনা থবক মখা চৎথরক্লগনি।

রাজ্য সভাগী ওইনা দিপ্যুটি চ্যেরমেন ওইনা লৈরিবা হরিভন্স নারায়ন সিংহনা প্রিসাইদ তৌদুনা চত্থখিবা ঙরাংগী মীফমদু হেক হৌরকপদা ওপ্পোজিসনগী মেম্বরশিংনা, হৌজিক-হৌজিক ইস্যু অমা ওইনা লৈরিবা বিহার ইলেক্তোরেল রোলগী স্পিসিয়েল ইন্টেন্সিব রিভিজন পাঙথোকপগী মতাঙদা য়াম্না কূপথনা খন্না-নৈনখিসি হায়বা ৱাফমশিং পুখৎলদুনা খোল্লাউ কয়াগা লোয়ননা রুলিং পার্টিগী থৌওংশিংবু য়ানিংদবা ফোঙদোক্নরকখি।

কন্সটিট্যুসনগী আর্টিকল ৩৫৬ কি মতূঙ ইন্না খন্ননবা পুখৎলকপা রিজোল্যুসন অমা, অপীবা মতমগী মনূঙদা পাস তৌননবা হোৎনবা হায়বসি মথৌ তাই অদুবু ওপ্পোজিসন্না ঙাইহাক লৈতনা অয়েৎ- অপন কয়া পীবনা রিজোল্যুসন অমত্তা লৌবা ঙমহন্দ্রে হায়না দিপ্যুটি চ্যেরমেন অসীনা পেন্দবা ফোঙদোকখি। চৈরক্তুদা মনিপুরদা প্রসিদেন্ট রুল অসী মখাতানা থা তরুক শাংদোকপগী ৱাফম ভোইস ভোত্তা পাস তৌখিবনি।