ইন্দিয়া লৈঙাক্না কুকি- মিলিটেন্টশিং শৌগত্তুনা জিও পোলিটিক্স কি থৌওং চত্থরক্লিবসি লেপ্তবা তারবদি ঈরাং অসী লোইশিনবা নাইখিরোই: কোকোমি

মনিপুরদা হৌখিবা কুমশিং ২০২৩ গী মে অহুমদগী ঙসিফাওবা লোইবা নাইদনা মপান্দগী চঙশিল্লকপা কুকি- মিলিটেন্টশিংনা ঈন্সীল্লগা মনিপুরদা লৈবা কুকি- মীফত্তা খরনা মদুদা তোংশিন্দুনা চত্থরক্লিবা হীংশাগী ঈরাং অসী ইন্দিয়া লৈঙাক্না শৌগৎপগী থৌওং কয়া চত্থবদগী লোইশিনবা ঙমদবনি হায়বসি নোংমা নোংমগী ময়েক শেংলকপগুম তৌরক্লে। মিলিটেন্টশিং অসীদা ইন্দিয়া লৈঙাক্না শৌগৎপগী থৌওং চত্থবা লেপত্রবদি হৌজিক লৈরিবা ঈরাং অসী কৈদৌনুংদা লোইখিরোই হায়না কোর্দিনেটিং কম্মিটি ওন মনিপুর ইন্টিগরিটি (কোকোমি) গী প্রসিদেন্ট সোমোরেন্দ্র থোকচোমনা ফোঙদোকখ্রে।

ইম্ফাল গী লম্ফেলদা লৈবা কোকোমিগী ওফিস্তা পাঙথোকখিবা পাউমীশিংগা উনবগী থৌরমদা মহাক্না ৱাফম অসী ফোঙদোকখিবনি। ভাইওলেন্স অসী লোইশিনবা ঙমদনা লৈরিবসিগী খ্বায়দগী মরূওইবা মরমদি ইন্দিয়া লৈঙাক্না প্রোক্সি ৱার চত্থরকপদগীনি। হীংশাগী ঈরাং অসী থেংনদুনা লোইশিন্ননবা চঙলকপনি হায়রিবা সেন্ট্রেল ফোর্সশিং অসীনা অহানবদদি মীচঙ-মীখায় নাইদনা ঈরাং অসী সোল্ব তৌনবা থবক তৌবা মাল্লম্বনি অদুবু তম্পাক্তা লো চৎনরগা চীঙদনা লো এন্দ ওর্দর চৎনহন্দবগী মতৌ অমা উবা ফংলি হায়না মহাক্না ৱাফম কয়ামরুম থমখি।

চুরাচান্দপুর অমসুং হন্দক কাংপোকপিদা কুকিশিংনা মথোঙ-মরম চাদবা ঈরাং শাগৎখিবা মতমদুনা সেন্ট্রেল ফোর্সকি পার্সনেলশিং অমসুং কাংপোকপী দিষ্ট্রিক্ট কি এস পি ফাওবা অশোক- অপন কয়ামরুম থোকখি। মদূ মৈতৈনা তম্পাক্তা ঈহৌ চঙশীনবা মতমদা থোকপা থৌদোক ওইরম্লবদি করি ওইমগনি হায়না মহাক্না নুংনাংবা ফোঙদোকখি। সেন্ট্রেল সেক্যুরিটি ফোর্সনা অত্তৎ- অখম লৈতনা নোংমৈ কাপশীল্লক্তুনা মীওই চাম্মা চাম্মনা খূজীং ওইদুনা শিরমগদবনি হায়না সোমোরেন্দ্র থোকচোমনা ফোঙদোকখি। মমাঙ চহীগী লোইশিল্লকপা মতম, দিসেম্বর ২৮ দা কুকি মিলিটেন্টশিংগী বঙ্কর খরা উয়োকচীঙদা থুগাইখিবা মতূংদা কুকি- নূপীশিংনা চত্থখিবা মথোঙ হূক্তবা, লমচৎ নাইদবা মওংগী খোঙজঙ অদূ তম্পাক্কি মৈতৈ নূপী, ঈমাশিংনা চত্থরম্বা তারবদি ঐখোয়গী মশীং য়াম্লবা মীচম মীয়াম কয়ামরুম মীশী-মীনা, অশোক- অপন থোক্লমগনি হায়খি।