হীঙশাগী ঈরাং মায়োক্নরবশিংগীদমক য়ূম লীশীং ৭ শাননবগী অয়াবা য়ূনিয়ন মিনিষ্ট্রিনা অয়াবা পীরক্লে

মনিপুরদা মমাঙ চহীগী মে অহুমদগী চিন কুকি- মিলিটেন্টশিংনা মৈতৈ ফূরূপকি মথক্তা লান্দারক্তুনা মখোয়গী তোঙানবা মরমদম অমা থম্ননবা হোৎনবদা মীয়াম্না অৱাবা কয়া ঙসিফাওবা মায়োক্নদুনা, মীওই চা কয়া শিখিবগী মথক্তা মীওই লীশীং কয়ানা মরমদমদা লাঞ্জেন্নরগা রিলিফ কেম্প শিংদা হৌজিক ফাওবা লৈদুনা মশাগী ময়ূমশিংদা লৈবা ফংদনা লৈরিবা অসীগী য়েংলগা সেন্টর লৈঙাক্কি রুরেল দেভলপমেন্ট এন্দ পঞ্চায়েটি রাজ মিনিষ্ট্রিগী মায়কৈদগী য়ুম লীশীং ৭ শাননবা অয়াবা পীরক্লে হায়না ষ্টেট লৈঙাক অসীগী রুরেল দেভলপমেন্ট এন্দ পঞ্চায়েটি রাজ মিনিষ্টর য়ূম্নাম খেমচান্দনা ফোঙদোকখ্রে।

ঙরাং ইম্ফালগী ওল্ড সেক্রেটরিয়েত্তা লৈবা রুরেল দেভলপমেন্ট এন্দ পঞ্চায়েটি রাজগী কনফরেন্স হোলদা পাঙথোকখিবা পাউমীশিংগা উনবগী থৌরমদা মিনিষ্টর অসিনা হায়, চৎলিবা জানুয়ারি থা অসীগী অহুমদা য়ুনিয়ন মিনিষ্টর ফোর রুরেল দেভলপমেন্ট এন্দ পঞ্চায়েটি রাজ সিভরাজ সিংহ চৌহানগা ভিদিও কনফরেন্সিংগী খূত্থাঙদা ৱারী শানবদা মনিপুরদা লৈরিবা ইন্টর্নেল্লি দিসপ্লেস পার্সন (আই দি পি) লীশিং ৬০ রোম লৈরিবা অসীগীদমক য়ূম লীশিং ৭ শাননবগী মতাংদা মিনিষ্টর অসিনা অয়াবা পীরকখিবনি। অদূম ওইনমক দরকার লৈরিবদি য়ূম লীশিং ১৫ রোম্নি। মরম অদুনা মখা তানা য়ূম লীশিং ৮ শাননবা অয়াবা পীবীয়ু হায়জখি। মদুসু অথূবা মতমদা সেঙ্কসন তৌরক্লগনি হায়বগী থাজবা লৈরে হায়না খেমচান্দ না ফোঙদোকখি।

য়ূম অমা শাবদা হৌজিক পীরক্লিবা হীসাব অসীগী মতূং ইন্না শুপ্নগী লূপা লাখ ১.৩০ রোমদমক চঙবগী মওংনি। মসিদি য়ারোইদবা অমনি অদূনা য়ূম অমদা লূপা লাখ ৫ দগী তাদনা দরকার লৈ হায়না খঙহনখ্রে। মসিমসু অয়াবা পীননবা থৌরাং লৈরে হায়না মিনিষ্টর খেমচান্দনা ফোঙদোকখি।