এগজাম সেন্টরগী অকোয়বদা গার্জিয়ানশিং চয়োম শানা থোমজিন্দুনা লৈবনা মীয়ামদা খুদোংচাদবা থোক্লি

চহী অসীগী ওইনা হৌখিবা ফেব্রুয়ারি থাগী ২৩ দগী বোর্দ ওফ সেকেন্দরি ইদুকেসন মনিপুর (বোসেম) না কন্দক্ট তৌবা হায় স্কুল লিভিং সার্টিফিকেট এগজামিনেসন হৌখ্রে। এগজাম অসী চৎলিবা মার্চ থা অসীগী ২৩ ফাওবা চত্থগদৌরিবনি। অহৌবা নুমিত্তা এগজাম সেন্টর খরদা পামদবা থৌদোকশিং খরা উবা ফংনখি।মদূগী মতূঙ তারকপদদি হৌজিকফাওবদা পামদবা থৌদোকশিং কা হেন্না থোকপগী পাউদি লৈতে, অদূম ওইনমক মহৌশা এগজামগী চৎনবী পরীঙ অদুদি কায়থরকপগুম্বগী মতৌ কয়া উরি।এগজাম সেন্টরশিংগী অকোয়বা, মিটর ১০০ না কোনবা রেদিয়সতা অথীঙবা থমদুনা এগজামদা নত্তবা পাম্বৈ, পাউখুম ইদুনা পীশীনবনচিংবা অনফ্যের মিন্স শীজীন্নবা য়াহন্দবগী মওং-মতৌশিং অদূ হৌজিক কদায়ফাওবা চেকশীন্না ঙাকলিবগে হায়বসি হংনিঙায় ওইরি।এগজাম সেন্টরগী অকোয়বদা লৈরিবা অনকপা মফমশিংদা মহৈরোয়শিং অসিগা লোয়নরগা লাক্লিবা গার্জিয়ানশিং চয়োম শাদুনা কোয়শীন্দুনা ফমজীনবা অমসুং লেপশীন্দুনা লৈবা মীয়াম্না উরি।থৌওং অসীনা মীয়ামদা, মরূওইনা এগজামশিং অসীগা মরী লৈননা থবক তৌরিবা ওফিসিয়লশিংগী চত্থোক-চৎশীন তৌবা অমসুং মফমশিং অসীগী এনভাইরনমেন্ট দা অকায়বা পীরক্নবগী মরমশিং ওইরি।
বোসেমগী সেক্রেটরি না হন্দক পাঙথোক্লিবা ঐচ এস এল সি এগজাম অসীদা অনফ্যের মিন্স শীজীন্নবশিং অকনবা চৈরাক পীবগী মথক্তা লূপা ক্রোরনা খূজীং ওইদুনা ফাইন থীহনগনি হায়বা ৱাফমশিংসু ফোঙদোকখিবগা লোয়ননা ফ্লাইয়িং স্কৱাদ টিম কয়া শেমদুনা য়াম্না মওঙ-মরীল তানা এগজামশিং অসী পাঙথোক্নবা হোৎনরকখি অদুবু গার্জিয়ান ময়ামগী মপৈ-মপৈনা এগজাম সেন্টরশিংগী মমাঙদা লৈরিবসিমদি কূমহৈগী মওঙনি, তৌহন্নিংদে।
এগজাম নুমিত্তা ঈচা-ঈশূ কা হেন্না নুংশিবিরিবা অসীগুম্না লাইরিক -লাইশু তম্লিঙৈ, স্কুলদা চাং নাইনা চৎলিব্রা, ক্লাস চাং নাইনা য়াওব্রা, কনাগা লোয়নরি, করম্বা সঙ্গদা তিল্লিবগে, লাইরিক নীঙথিনা পারিব্রা, করি চীঞ্জাক চারি-থক্লিবগে হায়বরোমদা মতম চানা য়েংশিনবিবা অদূনা হেন্না মরূ ওইগনি খঞ্জৈ।
তোঙান তোঙানবা ভল্লন্টরি ওর্গানাইজেসন শিংনা ঙাইহাক লৈতনা, এগজাম সেন্টরশিংগী লৈরিবা ওফিসার-চার্জশিংগী অয়াবসু লৌদনা কুশী তৌদুনা চঙশীন্দুনা ইন্সপেক্সন চত্থবগী থৌওংশিং অসীসু পূক্নিং থৌগৎনীংদে। মসীগুম্বা থৌওংশিং অসীনা পাম্লিবা অফবা পান্দমশিং অদূ ফংবদি লায়রদনা এগজাম থারিবা মহৈরোয়শিংদা অকি-অখং থোকহন্দুনা খুদোংচাদবা মায়োক্নহল্লকপসু য়ারিবনি।মহৈরোয়শিং ঈংনা-চীক্না অমসুং নুঙাইনা এগজাম মায়োক্নহন্নবা হোৎনবা ফৈ হায়বসি মীয়ামগী ৱাখল্লোন্নি।