অরানবা সেন্সস পাঙথোকহন্দনবা খোঙজঙগীদমক শেম শাদুনা লৈরে: জিতেন্দ্র নিঙোম্বা

পোলিটিসিয়ানশিংনা মখোয় মীখলদা ভোৎ মায় পাক্তবা য়াদে, এম এল এ, মিনিষ্টর ওইদবা য়াদে হায়বগী ৱাখলদা মীতোপ -মীয়ানচাশিং য়োকখৎনবগী খোঙথাঙ লৌখৎলোইদবনি, মীতোপশিং য়োকখৎলোইদবনি।ষ্টেট এসেমব্লীদা ৱারেপ লৌরবসু নত্রগা লৌদ্রবসু অরানবা মওংদা সেন্সসকি থবক-থৌরম অমত্তা পাঙথোকপা য়াখিরোই।মদূ চত্থরকপা তারবদি মীয়াম হূপ্না খোঙজঙ চঙশীন্দুনা অকনবা মওংদা অথীংবা পীননবা শেম-শাবা পূম্নমক লোইরে হায়না কেম্পেইন ফোর জষ্ট এন্দ ফ্যের দিলিমিটেসন ( জে এফ দি) গী কনভিনর জিটেন্দ্র নিঙোম্বনা অকনবা ৱাফম ফোঙদোকখ্রে।
ঙরাং ইম্ফাল ৱেষ্ট দিষ্ট্রিক্টকি মনূঙ চন্না লৈবা ফূম্লৌ খুঙ্গংগী কম্যুনিটি হোলদা সেন্সসকি মতাঙদা পাঙথোকপা মীয়ামগী মীফমদা জিটেন্দ্রনা ৱাফম অসি ফোঙদোকখিবনি। মহাক্না হায়, ইন্দিয়া লৈঙাক্না লৈবাক অসীগী মফমশিং শীন্থুংবদা লাক্লিবা এপ্রিল থাদগী হৌরগা য়ূমকোক অমসুং মীকোক থীবগী থবক পায়খৎনবা ৱারেপ লৌখ্রবনি।সেন্সস পাঙথোকপদা অথিংবা পীরুবা য়াদে, থোইনা হেন্নদুম মীয়াম্না মতেঙ পাংশিনগদবনি অদুবু মনিপুরগী হৌজিক ওইরিবা ফিবম অসিদা সেন্সস পাঙথোকহনবদি কৈদৌনুংদা য়াবা ঙমখিরোই।
মনিপুরগী ওইনদি হৌখিবা চহী কয়াগী মতমদগী মীতোপ লীশীং কয়ামরুম চঙশীল্লক্তুনা লৈশিনখ্রবনি।মসীনা মরম ওইরগা মীরমদগী আইন কায়না,লোন্না চঙশীল্লকখিবা মীতোপশিংনা তোঙানবা হোমলেন্দ তাল্লকপদগী ঙসী লমদমসিদা হীঙশাগী অকনবা ঈরাঙ মায়োক্নরি। লান থোক্লিঙৈ চৈরকশিদসু হৌজিক-হৌজিক ম্যান্মার অমদি অতৈ মীরমদগী মীতোপ লীশীং কয়া চঙশীল্লকপগী থৌওংশিং মীয়াম্না খঙনরবা, উনরবা ঙাক্তনি, মখোয়বু হান্না মশক খঙদোক্তুনা তকথোকখ্রবা মতূঙদা সেন্সসকি থবক চত্থহনগদবনি। মদূ নত্রবদি মীতোপশিং অসী ইন্দিয়াগী সিটিজন ওন্থোকখ্রগনি হায়না জিটেন্দ্র নিঙোম্বনা মখা তাখি।