মনিপুরদা মমাঙদগী লীশাং শীৎনা চৎনবী অমা ওইনা লুহোং-খোঙদোঙবদা শেল কা হেন্না চঙহনবা অসী নোংমা-নোংমগী তঙায়ফদবা ফেসন অমা ওইরক্লি । শেন্থোক ৱাৎপা অসীনা মরম ওইরগা ষ্টেট অসীদা নহারোলশিং অয়াম্বনা মতম চানা য়ূম্বান-কৈবানবা তন্নরে, লুহোংগদবা কিনরকপদগী ঙসী মেজোরিটি ওইনা লৈরিবা মৈতৈগী মশীং অসী হেঙ্গৎফম থোকপা চাংদগী য়াম্না হন্থরক্লি হায়না ৱাখল্লোন মান্নবা অপূনবা (ৱামা) কংলৈপাক্কি প্রসিদেন্ট মোইরাংথেম নাউখম্বনা ফোঙদোকখ্রে।
ৱামা লিংখৎখিবা চহী তরূক শুরকপগী কুম্মোন থৌরম ঙরাং ইম্ফালদা লৈবা মনিপুর প্রেস ক্লবকি সঙাই হোলদা পাঙথোকখিবগা লোয়ননা থৌরমদুদা ৱা ঙাঙবদা নাউখম্বনা ৱাফম অসী ফোঙদোকখিবনি। থৌরম মপূগী ৱারোল পীরদুনা মহাক্না হায়, মৈতৈনা মীশীং হন্থরক্লিবা অসীগী মরম অসুম থিগৎলুবদা খ্বাইদগী মরু ওইবা মরমদি শেন্মিটলোন ফত্তবদগী নহারোলশিংনা মতম চানা য়ূম পালহৌদবদগী মীশীং কা হেন্না হন্থরকপা ওইরম্লে। হৌজিক লৈরিবা মীশীং হেঙ্গৎপগী চাংচৎ অসীদা অসূম লৈরবদি ঙসী মনিপুরদা মেজোরিটি ওইনা লৈরিবা মৈতৈ ফূরূপ অসী চহী ২০-৩০ গী মতূঙদদি মাইনোরিটি ওইরকপা য়াবগী অকীবা লৈরি হায়খি।
পোকপদগী শিবা ফাওবদা পাঙথোক্লিবা থৌরমশিং অসী মৈতৈ ফুরূপকীদি মশীং থীঙমদনা য়াম্মি।থৌরমশিং অসী য়ারিবমখৈ ককথরগা অমদি তঙায়দনা তৌদবা য়াদবা লাই-তীনগী থৌরমশিংখক্তমক পাঙথোক্নবা হোৎনমিন্নরসি, ঐখোয় পূন্না ৱাখল তামিন্নরগা থবক পায়খৎহৌদ্রবদি মৈতৈ হায়বসি মতম অমদা মনিপুরদা মেজোরিটি ওইনা লৈরম্মী হায়না তুংগী মীরোলনা পুৱারিগী লম্মায়শিংদা থেংনবা নত্তনা পূম্নমক খোঙ্গূল মূৎখিবা য়াই, ৱারীখক ওইনা লৈহৌরগনি হায়বসি খন্থমিন্নরসি হায়না নাউখম্বনা ফোঙদোকখি।