মনিপুর লৈঙাক্কি দিপার্টমেন্ট ওফ য়ূথ এফিয়ার্স এন্দ স্পোর্টস না শীন্দুনা পাঙথোকখিবা ৬৫ শুবা ষ্টেট লেভেল সুব্রোটো মুখর্জি ফুটবোল টুর্নামেন্ট, ২০২৬ কি য়ু-১৭ বোইজগী ট্রায়েল সেলেক্সন্দা টিম চেম্পিয়ন ওইখ্রবা এজি মেমোরিয়েল একাদমি, থৌবাল চরাংপাৎকি শান্নরোয়শিং দিল্লিগীদমক ইম্ফাল থাদোকখ্রে। মখোয়না ৬৫শুবা সুব্রোটো কপ ইন্টর্নেস্নেল ফুটবোল টুর্নামেন্ট, ২০২৬ তা শরূক য়ারুগদবনি।
একাদমি অসীগী শান্নরোয় -মহৈরোয় ১৬, টিচর ইন-চার্জ অমা, টিম মেনেজর অমসুং কোচ পূম্নমক্না হন্দক্কি ইন্টর্নেস্নেল টুর্নামেন্ট অসীদা মায় পাক্লক্নবগীদমক একাদমি অসীগী টিচীং অমদি নোন-টিচীং ষ্টাফশিংনা য়াইফা-মঙ্গোল পীখি। থৌজাল পীবগী থৌরমদুদা একাদমি অসীগী প্রিন্সিপাল টি ঐচ মাষ্টরনা হায়, স্কুল অসীগী মহৈরোয়শিংনা মনিপুরগী মহুৎ শীন্দুনা ইন্টর্নেস্নেল টুর্নামেন্ট দা শরূক য়ারুনবগী খুদোংচাবা অসী ফংলকপদা তশেংনা চাউথোকচবা ফাওই। হন্দক্কি ইন্টর্নেস্নেল টুর্নামেন্ট অসীদা একাদমি অসীগী শান্নরোয়শিংনা মায় পাক্লক্তুনা স্কুল অসীগী অমদি মনিপুরগী মিংচৎ পুরকপা ঙম্বা ওইরসনু হায়বা ৱাফম থমখি।
পনবা য়াই, হৌখিবা আগষ্ট ১৮ দগী হৌরগা সেপ্তেম্বর ২৪ ফাওবা চত্থরিবা ৬৫ শুবা সুব্রোটো কপ ইন্টর্নেস্নেল ফুটবোল টুর্নামেন্ট -২০২৬ অসীগী য়ূ-১৭ বোইজগী মেটচ শিং সেপ্তেম্বর ১৫ দগী চত্থবা হৌগদবনি।
