মনিপুরি মচীন-মৌপ্ৱা অনীনা এয়র ইন্দিয়াদা থবক তৌমিন্নদুনা ষ্টেট অসীগী মীয়ামগী পূক্নীং চিংশিনখ্রে

হৌখিবা কুমশিং ২০১৪ দা লৈবাক অসীগী এভিয়েসন ইন্দষ্ট্রিদা মশাগী পামজরবা কেরিয়র অমা ওইনা এয়র ইন্দিয়াদা থবক তৌখিবি মনিপুরদগী ৱাহেংবম সুরৈয়ানা কেবিন ক্রূ অমা ওইখিবদগী, মহাক্কা পোকমীন্নবা মৌপ্বা ৱাহেংবম রোহিট সু মচেগী কেরিয়র অদুনা থম্মোয়দা অপাম্বগী ইহুল ফাওরকপগা লোয়ননা এয়র ইন্দিয়াদা চঙখিদুনা নুঙাইরবা, মথূম-মরাঙ হৌরবা অতিয়াগী খোঙচত্তা ঈরোয়নদুনা মচীন-মৌপ্ৱা অনীনা মীওইবা খুন্নাইগী থৌগল তৌরি। মসীনা হৌরক্লিবা মনিপুরগী নহারোলশিংদা পূক্নীঙগী অনৌবা ইথিল পীবা ঙমখ্রে।
মচেনা কেবিন ক্রূ অমা ওইনা মালেমগী তোঙান-তোঙানবা লৈবাকশিংগী মফম কয়াদা কোয়না পাইদুনা মীওইবা খুন্নাইগী সেবা তৌবদু উরগা অমসুং খন্থরুরগা রোহিটকি থম্মোয়দা মচে সুরৈয়াগুম এয়র ইন্দিয়াগী ষ্টাফ অমা ওইনা লৈরগা মীয়ামগী সেবা তৌনিংবা ফাওরকখি হায়রি। ইম্ফালদা চহী নিপাল্লোম তোঙান তোঙান্না লৈনরুরবা মতূঙদা মচীন-মৌপ্ৱা অনীদো ঙসীদি এয়রলাইন অমত্তদা পূন্না থবক তৌমিন্নবা ফংবদগী ঙাইহাক লৈতনা মশক উনবা, ৱারী-ৱাতায় শানবা, চামীন-থকমীন্নবগী খুদোংচাবসু ফংজরদুনা হরাও-নুঙাইনা হিংমিন্নবা হায়বদু ওইরি।
বালি, দুবাইনচিংবদা তান চানরুবা থৌদোক ওইনা দেষ্টিনেসন অমত্তদা মচীন-মৌপ্ৱা পূন্না থুংমিন্নখিবা মতাঙসু য়াওখি হায়না রোহিটনা ফোঙদোরক্লি। মালেমগী মীয়াম মরক্তা ৱা ঙাঙনবগী খুদোংচাবা ফংদ্রবসু লাপ্তক্না মচীন-মৌপ্ৱা য়েংনরগা খূৎনা ইঙ্গিৎ তৌনবা মীকূপশিংদু নুংশিবনা থল্লি, কাউঙমদবা থৌদোকশিং ওইরি হায়না ফোঙদোরক্লি।
য়াম্না শাংনা, মালেমগী অরাপ-অরাপ্পা মফমশিংদা পাইরুরবা মতূঙদা মৌপ্বা রোহিটনা ফোঙ-ফোঙ শারিবা চাক-য়েঞ্জাং পুথোরক্লগা পূন্না চামীন-থকমীন্নবসু মরক-মরক্তা ফংজৈ হায়না সুরৈয়ানা হরাওবা ফোঙদোরক্লি।