তোকপা লিয়াংমৈ নাগা ভিল্লেজগী য়ূম ১০, চর্চ অমা মৈ থাদোক্লম্লে

কাংপোকপি দিষ্ট্রিক্টকী মাহিকা অমসুং লাৱর থানম্বা ভিল্লেজ অনীগী মরক্তা লৈরিবা তোকপা লিয়াংমৈ নাগা ভিল্লেজগী য়ূম ১০ অমসুং চর্চ অমা শকখঙদবা, মতীক চানা খূৎলায় পায়বা কুকি নোর্কো-টেরোরিষ্টশিং ওইগনি থাজবশিংনা মৈ থাদোক্লম্লে। থৌদোক অসী চৎলিবা থা অসিগী ১১ গী নুমিদাং ৯:৩০ রোম তাবা মতমদা থোকখিবনি।

থৌদোক থোক্লিবা মফম অদূগী মনাক নক্না সেন্ট্রেল সেক্যুরিটি ফোর্সেস অমদি মনিপুর পুলিস পার্সোনেলশিং মরাং কায়না লৈরবসু মিলিটেন্টশিং অদূবু ঙাকথোক্নবা অমসুং এক্সন লৌখৎনবা থৌরাং অমত্তা লৌখৎখিদে হায়না লিয়াংমৈ নাগা ভিল্লেজগী খুঞ্জাশিং অমসুং লিয়াংমৈ নাগা কাউন্সিল মনিপুরনা য়াম্না কন্না য়ানীংদবা ফোঙদোরকপগা লোয়ননা পেন্দবা ৱাফমশিং থম্লক্লি। মীচম মীয়ামগী য়ূম মৈ থাবা, চর্চ মৈ থাবগী থবক অসী কুকি নার্কো-টেরোরিষ্টশিংতনা মমাঙদগী চত্থদুনা লাক্লিবা থৌওং অমনি।হন্দক্কি অসীসু টেরোরিষ্ট শিং অদূনা তোকপা লিয়াংমৈ নাগা ভিল্লেজদা নোংমৈ রাউন্দ মশীং খঙদনা কাপশীল্লবা মতূঙদা য়ূম ১০ অমদি চর্চ ১ মৈ থারম্বনি হায়রি।

মথৌ পাঙথোক্তনা কুমহৈ অমগুম য়েংদুনা তূমীন্না লৈখিবা সেন্ট্রেল সেক্যুরিটি ফোর্সশিং অমসুং মনিপুর পুলিস পার্সোনেলশিং অদূগী মথক্তা মপূঙ ফাবা ইনক্বারি অমা লৈঙাক্কি অথোরিটিনা চত্থদুনা মরালগী মতূঙ ইন্না আইনগী থবক লৌখৎপিয়ু অদুগা কুকি টেরোরিষ্ট শিং অদূগী মথক্তা আইনগী অকনবা থবক লৌখত্তুনা চৈরাক ফংহল্লু হায়না লিয়াংমৈ নাগা কাউন্সিলনা দাবী তৌরি। মৈনা তুম্না চাকখ্রবা য়ূমশিং অদূগীদমক মতীকচাবা কম্পেন্সেসন পীবিয়ু হায়নসু লৈঙাক্কি মফমদা তকশীল্লক্লি।