লিগেল রাইট্স ওফ ৱিমেন হায়বা হীরমদা এৱ্যের্নেস পাঙথোকখ্রে

মনিপুর ষ্টেট কম্মিসন ফোর ৱিমেন (এম এস সি দব্লিয়ু) ইম্ফালনা দিমদাইলোং ৱিমেন সোসাইটি গা খূৎশম্নদুনা নোংমগী ওইবা এৱ্যের্নেস প্রোগ্ৰাম অমা ঙরাং ইম্ফালগী ন্যু চেক্কোন্দা লৈবা কম্যুনিটি হোলদা পাঙথোকখ্রে। লিগেল রাইট্স ওফ ৱিমেন হায়বা হীরমদা পাঙথোকখিবা থৌরম অদুদা ৱিমেন কম্মিসন অসীগী চ্যেরপার্সন ওইনা লৈরিবা থুমলিপ তিন্নিংফম মোন্সাংনা  শরূক য়ারদুনা ফোঙদোকখিবা মতূঙ ইন্না, অৱাবা মায়োক্নরবা, মশাগী ফংফম থোকপা রাইটশিং অতোপ্পা মীওই অমনা নত্রগা মীওই খরনা খোঙ্গাওনরক্লবী নূপীশিংনা ঈকায়বা,অকিবা পূম্নমক তুংওইনরগা পন্থবা তৌদনা নূপীশিংগী হক্কিদমক থবক পায়খৎলিবা এম এস সি দব্লিয়ু দা লাক্তুনা মখোয়গী পেন্দবা ৱাকৎশিং অদূ থাঙ্গত্তুনা জষ্টিস ফংজনবা হোৎনগদবনি।

কম্মিসন অসি রাইট মৎপীরবা, খুদোংচাদ্রবা নূপীশিংগী ফীভম ফগৎহন্ননবা লৈরিবনি হায়বা ৱাফম থমখি। থৌরমদুদা ৱা ঙাঙবদা এম এস সি দব্লিয়ুগী মেম্বর সেক্রেটরি অমসুং আই পি আর মনিপুরগী এদ্দিস্নেল দিরেক্তর দব্লিয়ু ফজতোম্বিনা, অসিগুম্বা এৱ্যের্নেস প্রোগ্ৰাম অসী নূপীশিংনা মশাগী লিগেল রাইটশিংগী মরমদা খঙহন্নবা পূক্নিং -লৌশিং ওইহল্লিবা অমনি হায়খি।

থৌরম অদুদা শরুক য়াখিবা দিমদাইলোং ৱিমেন সোসাইটিগী হান্নগী সেক্রেটরি থীয়ামপুইনা এলাইজ রুবি না হায়, ঐখোয় নূপী ওইবিশিং, থোইদোক-হেন্দোক্না মাইনোরিটি কাঙলূপকি নূপীশিংনা অৱাবা খুদোংচাদবা কয়া মায়োক্নরবসু ঈকায়বদগী, কিবদগী কম্মিসন অসিদা নত্রগা লো কোর্টশিংদা ৱাকৎ থাঙ্গৎপগী চাং য়াম্না হন্থনা লৈরিবসি লাইবক থীবনি, মসি খক তৌরোইদবনি হায়খি। এম এস সি দব্লিয়ু না দোমেষ্টিক ভাইওলেন্স কা মরী লৈনবা কেসশিং অমদি নূপীশিংগী অতৈ অৱাবা কয়া কোকহন্ননবা পায়খৎলিবা প্রোগ্ৰামশিং মহাক্না শীঙথাখি।