মৌ নহা অমা শিনা ফংবদগী মীয়াম্না ঈরাং হৌরকখ্রে,মপূরোয়বা পুলিস কষ্টদি য়ৌখ্রে

ইম্ফাল ৱেষ্ট দিস্ট্রিক্টকি ৱাঙ্গোই পুলিসনা কোনবা ৱাঙ্গোয় মমাঙ খাইদেমদা ইরম সিফাইদগী য়ূম পাল্লকপি মৌ নহা অমা খঙহৌদনা,য়াম্না চিংননিঙায় ওইবা মওংদা শিদুনা লৈরম্বা থেংনখ্রে।থৌদোক অদূগী মতাঙদা মীয়াম্না অকনবা ঈহৌ শাগৎলকখ্রে।নূপা ময়ূমগী পোৎ-চৈ কয়ামরূম নূপী ময়ূমগী মীওইশিংনা থুগায়রমম্লে। থৌদোক অদূগী মতাঙদা পুলিসকি পাউ অমনা ফোঙদোরক্লিবদি, চৎলিবা থা অসীগী ২৬ কি নুমিদাংদা নূপী অসী য়ূমদগী থোকখিবদগী হঞ্জিল্লক্ট্রে হায়দুনা ৱাঙ্গোই পুলিস ষ্টেসন্দা মিসিং রিপোর্ট অমা থাঙ্গৎলকখি।

মদূগী মখাতাবা খোঙথাঙ ওইনা মহাকপু থিবগী থবক চত্থদুনা লৈরিঙৈ চৈরক্তা থীয়াম অমসুং খাইদেম খুল অনীগী তাইনবদা লৈবা ইবূধৌ পাঙ্গলবা লাইশংগী লম্পাক মনাক্তা লৈবা উমং অমদা  মৌ নহা অদূ শিদুনা লৈরম্বা মীয়াম্না থেংনরকখিবনি।মৌ নহা অসীগী ঙকশমদা অমুবা দাগ খরা লৈরম্বা থেংনখিবা মরম্না মহাকপু অতোপ্পা মীওইনা তমথীনা ওৎ-নৈরবা মতূঙদা হাৎপা ওইগনি হায়বগী চিংনবা লৈ হায়রি। খাইদেম ওঙবী চাউবা (২৭) ,মপূরোইবগী মিং কে ঐচ বোইনাও এলাইজ নারেশ্বর (২৯) হায়রিবী অসীগা মহাক্কি মপুরোইবা অসিগা মমাঙদসু ঙাইহাক লৈতনা খৎন-চৈনখিবগী থৌদোক য়াম্না লৈবগা লোয়ননা মপামদসু কয়ারক হন্না চেল্লক্তুনা লৈরম্লবনি হায়বগী রিপোর্ট লৈ হায়রি।

মরম অদূনা মখাতাবা থবক লৌখৎনবগীদমক মপূরোইবা বোইনাও পুলিসনা লৌখত্তুনা ৱাহং-পাউহং চত্থবা হৌখ্রে।লৈখিদ্রবীগী পীক্লিবা মচানূপী অমা অমসুং মচানূপা অমা লৈহৌরি। থৌদোক অদূগী মতাঙদা খোয়শাওনরবা নূপী মপামগী মীওইশিং থোমজীল্লক্তুনা বোইনাওগী য়ূমগী পোৎলম কয়ামরুম থুগাইখ্রে।পুলিসনা মীয়াম অদূ কন্ট্রোল তৌননবা হোৎনবদা পুলিস অমদি মীয়ামগী মরক্তা চাউনা মূক্নখি।