নোর্থ ইষ্ট রিন্যুয়েবল ইনর্জী এন্দ ইলেক্ট্রিক ভেহিকল এক্সপো -২০২৫ গুৱাহাটিদা পাঙথোকখ্রে

ফেদরেসন ওফ ইন্দষ্ট্রী এন্দ কম্মর্স ওফ নোর্থ ইষ্ট রিজন( ফাইনর) না ইন্দিয়ান ওইল কোর্পোরেশন লিমিটেদ (আই ও সি এল) গা খূৎশম্নরগা চৎলিবা নবেম্বর থা অসীগী ২১ দগী ২৩ ফাওবা নুমিৎ হুমনি চূপ্না গুৱাহাটি দা নোর্থ ইষ্ট রিন্যুয়েবল ইনর্জী এন্দ ইলেক্ট্রিক ভেহিকল এক্সপো -২০২৫ পাঙথোকখ্রে। গুৱাহাটি দা লৈবা শরুসাজাই ষ্টেদিয়মদা নুমিৎ হুমনি চূপ্না চত্থরকখিবা এক্সপো অদুদা লমদম অসোমগী মাঙজীল থানা থবক তৌরিবা কম্পেনিশিং,ইন্নোভেটরশিং,পোলিসি মেকরশিং অমসুং ষ্টার্ট অপশিং পূন্না উনদুনা খন্ন – নৈনবগী ফজরবা তাঞ্জা অমা লৌমিন্নখি।অৱাং -নোংপোকথংবা ইন্দিয়াগী লমদমসিদা ক্লিন ইনর্জী এদোপ্সনগী খোঙথাঙ হেঙ্গৎহন্ননবা মরূওইনা খন্ন -নৈনবগী তাঞ্জা লৌমিন্নখি।
অসামগী ঈকায় খুম্ননিঙায় ওইরবা মিনিষ্টর চন্দ্রমোহন পাতোৱারিনা থৌরমদু হৌদোকপদা অথোয়বা মীথূঙলেন ওইনা শরূক য়াখিবগা লোয়ননা ইন্দিয়াগী গ্ৰীন গ্ৰোথ এজেন্দাগী পরীং কায়হন্দনা থম্ননবা অনৌবা অমসুং পূক্নীঙ থৌগৎনিঙায় ওইরবা অসিগুম্বা প্লেটফোর্ম অমা শাগৎলকপগীদমক ফাইনরবু থাগৎখিবগা লোয়ননা অপেনবা ৱাফম কয়াসু ফোঙদোকখি। রিন্যুয়েবল ইনর্জী পুথোকপদা অৱাং নোংপোক্কি লমদম না লৌরিবা য়াম্না মওং -মরীল তাবা,শীঙথানিঙায় ওইনা ষ্ট্রেটেজিক ওইবা থৌদাংশিংবু পন্দুনা মহাক্না থাগৎখি।
লমদম অসীগী চাওখৎ -থৌরাংগী থবকশিংদা রিন্যুয়েবল ইনর্জীনা অচৌবা থৌদাং লৌই লোয়ননা ঐখোয়গী ওন্ট্রপ্রিন্যরশিং অসীনা সোলার,ৱিন্দ,হাইদ্রো অমদি ইলেক্ট্রিক মোবিলিটি গী খুদোংচাবশিং মীয়ামদা পাক -সন্না ফংহনবদা মরুওইবা থৌদাং কয়াসু লৌরি হায়না মিনিষ্টরনা শীঙথাখি।দি পি আই আই টিদগী লাকখিবা মীহূৎশিংনা ক্লিন ইনর্জীগী থৌশিল খোঙজেল য়াঙখৎহন্ননবা ইন্দিয়া লৈঙাক্না লৌখৎলক্লিবা ইনিসিয়েটিবশিং অমসুং হৌজীক লৈরিবা স্কিমশিংগী মরমদা শুগাইবা ৱারোলশিং থমখি। ই ভি শেম -শাদুনা পুথোকপা, অৱাং নোংপোক্কি লমদমদা ইন্দষ্ট্রীগী হীরম কয়াদা চাওখৎলকপগী মতাংদসু ৱাফমশিং ফোঙদোকখি।লমদম অসীদা ষ্টার্ট অপশিং অমদি এম এস এম ই য়োকখৎনবা অকনবা ইকোসিষ্টেম অমা শাগৎসু মরু ওই হায়না মীহূৎশিং অদুনা ফোঙদোকখি।