প্রসিদেন্ট দ্রৌপদি মুর্মু,জেপি নদ্দা অমদি মোহন ভগবট অথূবা মতমদা ইম্ফালদা লাক্কদৌরি

হন্দক লৈবাক অসীগী আর্মী চিফ উপেন্দ্র দ্বিবেদিনা ৱা ঙাঙখিবা মতাঙ অমদা ইন্দিয়াগী প্রসিদেন্ট দ্রৌপদি মুর্মুগী অৱাং -নোংপোক্কি খোঙচৎ মনূঙচন্না প্রসিদেন্ট অসী য়াম্না থুনা ইম্ফালদা লাক্লগনি হায়না ফোঙদোক্লম্লবা মতূঙদা বি জে পিগী নেস্নেল প্রেসিদেন্ট ওইনা লৈরিবা জে পি নদ্দা অমসুং আর এস এসকি লূচীংপুরেল মোহন ভগবট অনীসু ইম্ফালদা লাক্কদৌরি হায়না ওফিসিয়েল ওইবা পাউগী লীখূন অমনা ফোঙদোরকখ্রে।

ছোর্স অসীগী মতূঙ ইন্না,আর এস এসকি লূচীংপুরেল মোহন ভগবট, চৎলিবা থা অসীগী ২০ দা হায়বদি ঙসী ইম্ফালদা লাক্কনি হায়বা ৱাফম ফোঙদোকখ্রবনি অদূগা বি জে পিগী নেস্নেল প্রেসিদেন্ট ওইনা লৈরিবা জে পি নদ্দাসু হয়েং নবেম্বর ২১ দা ইম্ফালদা থুংলরগনি হায়রি। হন্দক বি জে পিগী নেস্নেল লিদর অনী ইম্ফালদা লাক্তুনা মনিপুরগী হৌজিক ওইরিবা রাজনিতিগী ফীভমশিং কূপ্না য়েংশিনখিবগা লোয়ননা বি জে পিগী লুচিংবা ৬ উনদুনা ৱারী শারমখ্রবা মতূঙ মোহন ভগবট অমদি জে পি নদ্দা লাক্লগনি হায়রিবা অসীদা য়েংলুরবদি য়াম্না ৱাহন্থোক লৈবা, রাজনিটিগা মরী লৈনবা খোঙচৎ অমনি হায়বমক য়াই।

প্রসিদেন্ট দ্রৌপদি মুর্মুগী ইম্ফাল খোঙচৎকি মতাঙদদি হৌজিক হৌজিকমক্কি ওইনা লৈঙাক্না ওফিসিয়েল ওইনা লাউথোরকপা লৈত্রি,অদূম ওইনমক পাউগী লীখূন অমনা ফোঙদোরকপগী মতূঙ ইন্নদি প্রসিদেন্ট মুর্মু লাক্লিবা দিসেম্বর নিপান্দগী তরা ফাওবগী মনূঙদা ইম্ফাল অমসুং চুরাচান্দপুরদা লাক্কদবনি হায়রক্লি। পনবা য়াই,হন্দক বি জে পিগী নেস্নেল জেনরেল সেক্রেটরি (ওরগানাইজেসন) বি এল সন্তোস অমসুং পার্টি অসীগী নোর্থ ইষ্ট ইন -চার্জগী থৌ পুরিবা সম্বিট পাত্রা ইম্ফালদা লাক্তুনা মনিপুরগী হৌজিক ওইরিবা রাজনিতিগী ফীভমশিং কূপ্না য়েংশিনখিবগা লোয়ননা বি জে পি মনিপুর প্রদেসকি লুচিংবা ৬ কা উনবা লৈখ্রবনি।

অথেঙবদা ফংবা পাউ অমগী মতূঙ ইন্না,বি জে পিগী নেস্নেল প্রসিদেন্ট ওইরিবা জে পি নদ্দা ইম্ফালদা লাক্ননবা থৌরাং তৌরম্বা অদূ ফীভম্না য়াদবা খরা লৈখিবদগী মতম কক্তনা য়ৈথোকখ্রে অদুগা অমরোমদা,আর এস এসকি লূচীঙপুরেল মোহন ভগবটতি ইম্ফাল দা শোয়দনা থুংলরগনি হায়রি।