সেপরেট এদমিনিষ্ট্রেসনগী দিমান্দ ফংদ্রিফাও পোপ্যুলর গভর্নমেন্ট শেম্বদা কুকি -জো এম এল এ শিং য়াওররোই: কুকি লূপশিং

মনিপুরদা হন্দক পি আর লৈরিবা অসীগী মতূঙদা পোপ্যুলর গভর্নমেন্ট অমা শেম্লকপা মতমদা কুকি -জো কাঙলূপকি এম এল এশিংনা শরূক য়াননবা ৱারেপ লৌখ্রে হায়বা ৱাফম অমা লমদমশিদা ফোঙবা পাউচেশিংদা ফোঙদোক্নরকখিবদু য়ূম্ফম য়াওদবা অরানবা পাউনি হায়না সস্পেন্সন ওফ ওপরেসন ( সূ) দা য়াওরিবা কুকি -জো কাঙলূপকি লালহৌলূপশিংগী অমব্রেল্লা বোদী ওইনা লৈরিবা য়ুনাইটেদ পিপলস ফ্রন্ট (য়ু পি এফ) অমসুং কুকি নেস্নেল ওরগানাইজেসন (কে এন ও) না পূন্না খূৎয়েক পীদূনা থাদোরকপা প্রেস ষ্টেটমেন্ট অমদা শেংদোরকখ্রে।
পাউচেশিংদা হন্দক অরানবা,য়ূম্ফম য়াওদবা পাউ অমা ফোঙনরকখিবদূ য়াম্না লাইবক থীবনি।

মতম কয়াগী মমাঙদগী কুকি -জো ফূরুপ্না তান্দুনা লাক্লিবা তোঙানবা লেজিসলেচর য়াওবা য়ুনিয়ন টেরিটোরি অমা শেম্নবগী দিমান্দ হায়বদি সেপরেট এদমিনিষ্ট্রেসনগী লেঙদ্রবা দিমান্দ অদূ মশক থীহন্ননবা থওইনা লৌতূনদুনা চত্থরকপা এজেন্দা অমা ওইগনি হায়রক্লি। কুকি -জো কাঙলূপকি মীয়াম্না চহী কয়াগী মমাঙদগী তান্দুনা লাক্লিবা তোঙানবা লেজিসলেচর য়াওবা য়ুনিয়ন টেরিটোরি অমা শেম্নবগী মতাঙ অসীদা মতম চূপ্পদা অহোংবা অমত্তা লৈরোই অদূগা কুকিশিংগী য়ুনিয়ন টেরিটোরি অমা শেমদ্রিফাওবা মনিপুর লৈঙাক শেম্বগী ৱাফমদা কুকি -জো কাঙলূপকি এম এল এ শিংনা কৈদৌনুংদা শরূক য়ারোই হায়বা ৱাফম ফোঙদোরক্লি।
চেরোল অসীনা মখা তানা হায়,হৌখিবা নবেম্বর ১৫ দা কুকি -জো কাঙলূপকি লালহৌলূপশিংগী অমব্রেল্লা বোদী ওইনা লৈরিবা লূপশিং অসীগী ওইনা অপূনবা মীফম অমা গুৱাহাটিদা পাঙথোকখি।কাঙলূপ অসীগী এম এল এ শিংসু মীফম অদূদা শরূক য়াখি।সেপরেট এদমিনিষ্ট্রেসনগী লেঙদ্রবা দিমান্দ অসী হেন্না চেৎশীলহন্ননবা অমসুং দিমান্দ অসী ফংদ্রিফাওবা মনিপুর লৈঙাক শেম্বদা শরুক য়াদনবা ৱারেপ লৌখি হায়রি।