লৈঙাক্কি মপী মপা ওইরিবশিংনা অচান-মীরায় নাইবা, রুল ঙাক্তবনা ঈরমদম অসীদা শান্তি পুরকপা, চাওখৎপা ঙমদ্রিবনি: এল তোম্বা

লৈঙাক পায়রিবা মীয়ামগী লুচিংবশিংনা মীয়ামগী য়াইফনবা থবক তৌবগী মহুত্তা মশা- মশাখক্কি ওইজবা, কান্নগদবা য়েংলগা থবক তৌনরকপা অমসুং দেমোক্রেসি চৎপা লৈবাক অসীদা মীয়াম্বু চপ মান্ননা য়েংবা ঙমদবা, অচান মীরায় নাইবা থৌওং চত্থরকপা কয়া অসীনা লমদম অসীদা রুল ওফ লো হায়বদু লৈরক্ট্রে। পূম্নমক অসীনা মরম ওইদুনা লমদম অসী চাওখৎ লম্বীদা চঙশীল্লকপগী মহুত্তা মনীঙ হন্দুনা লাকপগী থাক্তুদা লৈরিবনি। ভোৎ লেপ্তুনা মীখলদা মায় পাক্ট্রবদি মীয়ামগী সেবা তৌবা য়াদবগুম লৌনরক্লিবসি য়াম্না লাইবক থীবনি হায়না ফাওন্দেসন ফোর রুরেল অর্বান দেভলপমেন্ট, মনিপুরগী প্রসিদেন্ট এল তোম্বনা ফোঙদোরক্লি।
মহাক্না হায়, শঙ্গ লৈবা, শেঞ্জাও পায়বা ইনাকখুনবশিংনা লায়রবশিংগী ঈ চূপ্লগা হেন্না নুঙাইগনি খনবা তারবদি মদূ পাপকি মশক্নি, অফবা ফোল ফংলোই। মরম অদুনা অফবা ৱাখল খনবা তমগদবনি। মদূ ওইরবদি তাইবং শেম্বিবা মপূনসু চানবিগনি অদূগা মীয়াম্নসু য়াগনি। ঈনাক খুনবশিংনা খরা হেন্না কত্থোকপগী হৈনবী থম্বিদুনা লায়রবশিংদা কান্নবা ফংহন্ননবা হোৎনগদবনি। চহী অনী মখায় হেল্লক্লবা মতম অসিফাওবা মনিপুরগী নেস্নেল হায়ৱেশিংদা কনাগুম্বা কাঙলূপ অমখক্না মীয়ামগী লাইফলাইন ওইরিবা লম্বী থিংজিন্দুনা লৈবা হায়বসি মীয়াম্বু করিসু ওইনা খন্দবগী মতৌনি। মীয়ামগী থৱায় থদৎপনি, মীয়ামবু পাক্তক্ননা হাৎননবা হোৎনবনি হায়বদা লাল্ল রোইদবনি। অসীগুম্বা ফীভম অসীদা মীয়ামগী লুচিংবনি হায়দুনা লৈরিবা মনিপুরগী এম এল এ ৫০/৬০ না করিসু তৌবা ঙমজদ্রবা, উপাই লৈজদ্রবা ভাবোক্কুম চহী অনী-অহুম্লোম তূমীন্না য়েংদুনা লৈবা হায়বসি মীয়ামগী অশেংবা লুচিংবনি হায়বা য়ারোই হায়না মহাক্না থমখি।
মহাত্মা গান্ধী, নেটাজি সুভাসচন্দ্র বোস, হিজম ইরাবোৎ, বির টিকেন্দ্রজিৎ হায়রিবা লুচিংবশিং অসী ভোৎ লেপখিবা অমত্তা নত্তে অদূবু মীয়ামগী সেবাদা মপূন্সি কত্থোকখি। মখোয়না মীয়ামগীদমক মশাগী থৱায়ফাওবা কত্থোকখিবনি। মীয়াম্না ঙসীফাওবা মখোয়বু নুংশিনা শোন্নহৌরি, লাইগুম্না লাৎনরি। ঙসীগী রাজনিটিগী লুচিংবশিংনা লাইওইখ্রবা লুচিংবশিং অসীগী খূদুং খরদং ইন্দুনা থবক তৌরবদি চাওখৎলবা, নুঙাই য়াইফরবা মনিপুর অমা শেমগৎপা ঙমগনি হায়বা ৱাফমশিং তোম্বনা ফোঙদোকখি। ঐখোয়না লায়রবা, ঈনাকখুনবা খায়দনা আইন ঙাক্না চৎমিন্নগদবনি অদুগা লৈঙাক্লোয়শিংনসু কম্যুনিটি খূদীঙমক চপ মান্নবা মীৎয়েং য়েংবিদুনা, অচান-মীরায় নাইদনা মতেং পাংবিদুনা থোং মান্ননা চাওখৎলবা খুন্নাই অমা ওইহন্নবা হোৎনফম থোকপনি হায়খি।
স্কিল দেভলপমেন্ট পুরক্নবা লৈঙাক্না থবক পায়খৎপিয়ু, থবক শূদনা নুঙাইনা হিংবা য়ারোই। মতমগা চান্নরবা টেক্নোলোজি শীজিন্নরগা নহারোল থবক ফংদ্রিবশিং স্কিল ট্রেনিং পীননবা লুচিংবশিংনা থবক লৌখৎপিয়ু হায়খি।
চীঙদনা আইন চৎনদবা, তম্পাকখক্তদা আইন চৎনবগী থৌওং অমা উবা ফংলিবসি ঐখোয়গী লুচিংবশিং পূকচেল শেংদে, মতীক চাদ্রে হায়বগী ময়েক লারবা খূদম্নি হায়নসু ফাউন্দেসনগী প্রসিদেন্ট অসীনা ফোঙদোকখি। মী অনী খৎনরবদি ঐখোয়গী লৈমিন্নরিবা অতৈ কম্যুনিটিশিং অমসুং লৈঙাক্কি লুচিংবশিংনা য়েংদুনা লৈথোকপগী মহুৎ খামদোক্নবা হোৎনফম থোকপনি অদূবু ঙসীফাওবা দাইত্যা মশক খঙনা খামদোকপিদবদগী চহী অনীমখায় হেল্লবফাও ঈরাং অসী লেপ্পা লৈত্রিবনি। লৈঙাক্না দিভাইদ রুল শান্নরবদি লান লোইবা লৈরোই। লান্থেংনরগা তোংজবা, কান্নবা অমত্তা নাকল অনীমক্তা লৈরোই হায়না মহাক্না ফোঙদোকখি।