পোপ্পি থাদুনা মাঙহল্লম্লবা উমংগী শরুক্তা ৱা পাম্বী থাবা হৌরে: অনুরাগ ভাজপাই

মনিপুরগী চীঙগী মফমশিংদা পাক-সন্না উমং-ৱামং কোকথোক্তুনা পোপ্পি পাম্বীশিং থাদুনা ঐখোয়গী নহারোলশিং দ্রগকি ঈপাক্তা লূপহন্নবা হোৎনরম্বা কয়া অদূ ষ্টেট লৈঙাক অসীনা মতম চানা মূত্থত্তুনা মাঙহনবা ঙম্লক্লি। পোপ্পি থারম্বা মফম কয়ামরুম লৈঙাক অসীনা  ৱার ওন দ্রগ কেম্পেইন চত্থরকখিবদগী অয়াম্বা মফমশিং তকখায়দুনা মাঙহনখ্রে। অসীগুম্বা পাক- সন্না পোপ্পি থারম্বা মফম কয়াদা ষ্টেট লৈঙাক অসীনা অফবা মখলগী ৱা পাম্বীশিং থাদুনা ঐখোয়গী অকোয়বগী শক্তম কন্ননবা, ঈশীং- নুংশিৎকি খল কায়হন্দনা, তশেং- তশেংনা থম্ননবা অমদি মীয়ামদা শেন্থোক লৈহন্নবা অকনবা থৌরাং লৌখৎপা হৌরে হায়না মনিপুর লৈঙাক্কি ফোরেষ্ট দিপার্টমেন্ট গী প্রিন্সিপাল চিফ কঞ্জর্বেটর ওফ ফোরেষ্ট অনুরাগ ভাজপাইনা ফোঙদোকখ্রে।

ঙরাং ইম্ফালগী পেলেস গেট্টা লৈরিবা সিতি কনভেন্সন সেন্তরদা পাঙথোকখিবা ৭৬ শুবা বন মহোটসব থৌরম লোইশিনবগী প্রোগ্রাম অমদা মহাক্না ৱাফম অসী পাউমীশিংদা ফোঙদোকখিবনি। মমাঙ চহী ২০২৪ খক্তদা হান্না পোপ্পি থারম্বা চীঙগী লম হেক্তর ২৪৫ দা অফবা মখলগী ৱা পাম্বীশিং থাবা ঙমখ্রে। চৎলিবা চহী ২০২৫ অসীদসু হৌজিক ফাওবদা চীঙগী পোপ্পি থারম্বা লম হেক্তর ৪০০ রোমদা ৱা পাম্বী থাখ্রে। মসীনা খুঞ্জাশিংদা শেন্থোক হেঙ্গৎহনবগী মথক্তা মহৌশাগী খলসু কায়হন্দনা থম্বা ঙম্লগনি হায়খি।

মনিপুরগী অপূনবা লমগী চাদা ৭৮ দি উমংগী শরুক্নি। ঐখোয়না উমং-ৱামং ঙাক- শেন্দুনা থমগদবনি মসীনা তুংগী মীরোলদা তম্বা মরুওইবা খূদোল ওইগনি হায়না থৌরমদুদা শরুক য়াখিবা মনিপুরগী গভর্নর অজয় কুমার ভাল্লানা ফোঙদোকখি।