মনিপুরগী ঈরাং অসীদা চেন্নবনি হায়বা মীওই অমা এন আই এ না কেরলাদগী ফাগৎখ্রে

হৌখিবা কুমশিং ২০২৩ গী মে থাগী অহুমদগী চিন কুকি-নার্কো টেরোরিষ্টশিংনা শৌগৎপা কুকি-জো কাঙলূপকি মীওইশিংনা মনিপুরগী য়েলহৌমী ফূরূপ অমা ওইরিবা মৈতৈশিংগী মথক্তা লান্দারক্তুনা ঙসীফাওবা অকনবা হীঙশাগী ঈরাং লেপ্তনা থোকপদগী মৈতৈ অমদি কুকি ফূরূপখক্তা নত্তনা লৈমিন্নরিবা ফূরূপ খূদীঙমক্কি মীওইশিংগী মহৌশাগী পুন্সিদা খম থেংনা খুদোংচাদবা, অৱাবা কয়ামরুম মায়োক্নরগা লৈরি। চৈরক অসীদা, হৌজীক মায়োক্নরগা লৈরিবা হীঙশাগী ঈরাং অসীদা চেন্নবনি হায়বা মীওই অমা এন আই এগী টিম অমনা চৎলিবা থা অসীগী ১৬ কি নুমিদাংৱাইরম পূঙ ৫ রোম তারকপদা কেরলাগী থলাসেরি লমদমদগী ফাগৎপা ঙমখ্রে হায়রি।

হৌজিক থোক্লিবা হীঙশাগী ঈরাং অসীগী মনূঙচন্না তোঙান-তোঙানবা তাঙ্ককশিংদা মী হাৎপা, ফাবা, ফূবা-চৈবগী অমদি নোংমৈ কাপ্পা, য়ূম মৈ থাবনচিংবগী থৌদোক কয়ামরুম কুকি- জো অমদি মৈতৈ ফূরূপ অনীনা চত্থখিবদি লৈখ্রে। অদূম ওইনমক মীওই অসীনা করম্বা মখলগী ক্রাইম চত্থরম্বদগী মহাকপু ফাগৎলিবনো হায়বগী মতাঙদদি এন আই এ না অকূপ্পা ষ্টেটমেন্ট নত্রগা শেংদোক-ৱারোল অমত্তা খঙহল্লকপা লৈত্রি। এন আই এনা মহাককি মথক্তা মনিপুরগী ঈরাং অসীগা মরী লৈননা হান্নদগী কেস অমা রেজিষ্টর তৌরগা ফাননবা থিনদুনা লাকখিবনি হায়রি।

আর কে মাইপাকসনা কৌবা মীওই অসী ইম্ফাল এরিয়াদগীনি অদূগা মহাক হৌজিক হৌজিক্না কেরলাগী থলাসেরি লমদমদা লৈবা হোটেল অমদা হাওস কিপ্পিং জোব অমা তৌদুনা লৈবনি। সোসিয়েল মেদিয়াগী খূত্থাঙদা জোবকি এদভর্টিজমেন্ট অমা থেংনবদগী মহাক কেরলাদা লাকখিবনি হায়বা খঙবা ঙমখ্রে। আইদেন্টিটি ভেরিফিকেসন চত্থবদা মহাক্কি অধার কার্দ অমসুং ঙকশমদা য়েকপা টেটু মার্কতগী মহাককি অশেংবা মশক-মমিংদু এন আই এ না কনফার্ম তৌবা ঙমখিবনি। মহাক মনিপুরগী লালহৌলূপ অমগী ট্রেন তৌরবা মেম্বর অমনি হায়নসু এন আই এ না ফোঙদোরক্লি।