চহী অসীগী হৌখিবা মার্চ থাগী অহুমশুবা চয়োলদগী ঙশীফাওবদা আফ্রিকান স্বাইন ফেভর ( এ এস এফ) হায়না খঙনরিবা, য়ূমদা য়োকপা ওকশিং অমসুং লম্লক্তা লৈরিবা ওক অমদি মান্নবা কাঙলূপকি শাশিংদা য়াম্না লৌনগনবা লায়না লাইচৎ মখল অসী মিজোরামদা নৌহৌননা শন্দোরকপদগী য়ামদ্রবদা ওক ২,৩৫৭ শিখ্রে হায়না মিজোরাম ষ্টেটকি এনিমেল হজবেন্দ্রি এন্দ ভেটরিনারি লোয়শঙগী ওফিসিয়েল অমনা ফোঙদোরক্লি।
মিজোরামগী দিষ্ট্রিক্ট মরিদা লাইচৎ অসী খঙহৌদনা নৌহৌননা শন্দোরকখিবনি। হৌখিবা কুমশিং ২০২৪ গী দিসেম্বর ২৪ দগী চহী অসীগী মার্চ থাগী অনীশুবা চয়োল ফাওবা, নুমিৎ ৮০ হেন্না শন্দোরকখিদ্রবা মতূঙদা হৌখিবা মার্চ থাগী অহুমশুবা চয়োলদগী লাইচৎ অসী নৌহৌননা শন্দোরকপদগী য়ূমদা য়োকপা ওকশিং অদূ পাক্তক্ননা শিখিবনি। হন্দক নৌনা শন্দোকপা হৌরকখিবগী থৌদোক অদূ অহানবা ওইনা হৌখিবা মার্চ থাগী অহুমশুবা চয়োলদা মিজোরামগী ট্রিপুরা অমসুং বংলাদেশকা ঙমখৈ তাইনরিবা নোংচুপথংবা শরুক্তা লৈবা লোংটলাই অমসুং মামিট দিষ্ট্রিক্টশিংদনি।
ঙরাং শগোলসেন নুমিৎখক্তদা লাইচৎ অসীনা মিজোরামদা ওক ১৪০ শিহনখি। মসি থারগা শিখিবা ওক মশীং পূন্না ২,৩৫৭ শুখ্রে।
হৌখিবা কুমশিং ২০২১ দগী ২০২৪ ফাওবদা মিজোরামদা তমথিরবা লাইচৎ অসীনা ওক ৩৩,৪১৭ শিহনখি অদুগা লাইচৎ অসী ঙাকথোক্নবগীদমক লৈঙাক্কি ওফিসিয়েলশিংনা কল্লিং তৌদুনা হাৎখিবা ওক মশীংনা ১২,৫৬৮ নি হায়না ওফিসিয়েল দাটা অমদা ফোঙদোরক্লি।
