কুকি- জো কাঙলূপ্না নেস্নেল হায়ৱে থিংখিবদগী মাল পুরকপা গারীশিং পন্থদুনা লৈরি

মনিপুরগী নেস্নেল হায়ৱে পরীংদা অপন- অরাক অমত্তা লৈহন্দনবা অকনবা ইন্সট্রক্সন অমা য়ুনিয়ন হোম মিনিষ্টর অমিট শাহানা চৎলিবা মার্চ থা অসীগী অমদা ন্যু দিল্লিদা পাঙথোকপা অৱাংবা থাক্কি সেক্যুরিটি মীফমদা খঙহনখিবা অদুবু কন্না য়ানিংদবা ফোঙদোক্তুনা কুকি- জো ফূরূপকি মীওইশিংনা ঈহৌ চঙশীল্লকপদা সেক্যুরিটী ফোর্স পার্সনেলশিংগা হৌখিবা মার্চ নিপান্দা খূৎ থোক্নবদা কুকি- জো ফূরূপকি মীওই অমা নোংমৈনা পানবদগী শিখিবা অদুগী পেন্দবা ফোঙদোক্তুনা নেস্নেল হায়ৱে থিংলকপা ঙসিগা থারগা নুমীৎ মরিনি শুখ্রে।

মসিনা মরম ওইদুনা ইম্ফাল তম্না মাল পুদুনা লাকপা ট্রক অমসুং অতৈ পোৎ-চৈ পুদুনা লাকপা গারি কয়ামরুম লম্বীশিংদা পন্থদুনা লৈরি। ইম্ফালদগী অতোপ্পা ইন্দিয়াগী ষ্টেটশিংদা চৎখিগদবা মাল গারি কয়াসু চৎপা য়াদবনা খুদোংচাদবা কয়া মীয়ামদা মায়োক্নরগা লৈরি। কুকি- জো কাঙলূপকি লমহেন-তুহেনবা মিলিটেন্টশিংনা ঈন্সীন্দুনা ঈরাং অসী শাগৎলকপনি হায়রি। কুকি- জো কাঙলূপ্না মনিপুরদগী লম খাইদোক্তুনা মখোয়গী ওইবা য়ুনিয়ন টেরিটোরি ওইনা সেপরেট এদমিনিষ্ট্রেসন থম্বিয়ু, মদূ পীদ্রিবা ফাওবদি নেস্নেল হায়ৱেশিংদা গারীশিং চৎথোক-চৎশীন অমত্তা তৌবা য়াখিরোই হায়বসিনি। চৈরকশিদা, মতম খরা য়ানবা পুরকপা ঙমদবদগী লেপ্লুরবা দাইলোগ অদূ থা অসীগী ১১ দগী মখাতানা ৱারী শানবা হৌখ্রে।

চুরাচান্দপুর দিষ্ট্রিক্ট কি দেপ্যুটি কম্মিস্নারগী কনফরেন্স হোলদা পাঙথোকখিবা থৌরমদুদা লৈঙাক্কি মায়কৈদা মিনিষ্ট্রি ওফ হোম এফিয়র্স কি নোরথ ইষ্টকি এদভাইজর এ কে মিশ্রানা লুচিংবনি। কুকি- জো কাঙলূপকি ওরগনাইজেসন কয়া ৱারী শানরিবা অদূদা শরুক য়াখি।