পি এম সুর্য ঘর মুফ্ট বিজলি যোজনা গী এৱের্নেস কেম্পেইন হৌদোকখ্রে

প্রাইম মিনিষ্টর নরেন্দ্র মোদিনা মমাঙ চহীগী ফেব্রুয়ারি ২৯ দা অহানবা ওইনা ইন্দিয়াদা হৌদোকখিবা পি এম সুর্য ঘর মুফট বিজলি যোজনা অসীবু লমদমসিগী মীয়ামদা পাক-সন্না, ময়েক শেংনা খঙহন্দুনা স্কিম অসীগী কান্নবশিং লৌহন্ননবা পান্দমদা ঙরাং এৱের্নেস কেম্পেইন অমা হৌদোকখ্রে। মনিপুর ষ্টেট পৱার দিষ্ট্রিব্যুসন কম্পেনি লিমিটেদ ( এম এস পি দি সি এল) গী সেকেন্ড এম আর কমপ্লেক্স তা লৈরিবা অনৌবা দিরেক্টরেট বিল্ডিংদা কম্মিস্নার (পৱার) ওইনা লৈরিবা দা. সাইলেস কুমার তৌরাসিয়ানা কেম্পেইন অদূ হৌদোকখি।

থৌরমদুদা এম এস পি দি সি এলগী মেনেজিং দিরেক্তর হিজম শান্টিকুমারনা হায়, পি এম সুর্য ঘর মুফট বিজলি যোজনা হায়রিবা স্কিম অসী প্রাইম মিনিষ্টর নরেন্দ্র মোদিনা মমাঙগী চহী ২০২৪ গী ফেব্রুয়ারি ২৯ দা অহানবা ওইনা লোঞ্চ তৌখিবনি। মনিপুরদসু স্কিম অসী চৎনবা হৌরে। মসীগী মনূঙচন্না এম এস পি দি সি এলগী বোনাফাইদ কঞ্জুমরশিংনা য়ূমগী রুফতোপ সোলর খিন্ননবা হোৎনবদা চঙবা অপূনবা শেনফম অদূগী চাদা ৫০ হেন্না সেন্টর লৈঙাক্না পুথোক্লি অদুগা হায়রিবা

শেনফম অসী সবসিদি ওইনা পীবনি হায়খি। থৌরাং-থৌওং অসী পায়খৎনবা হোৎনবদা সেন্টরনা পীরিবা সবসিদিগী শেনফম অসী কিলোৱাৎ অমা পুথোকপগী চাংদা লূপা লীশীং ৩৩,অদুগা কিলোৱাৎ অনী পুথোকপগী ওইনা লূপা লীশীং ৬৬ কি শেনফম সবসিদি ওইনা পীরি। কঞ্জুমরশিংনা রুফতোপ সোলর সিষ্টেম অসী খিল্লগা সোল্লর ইনর্জী পুথোক্লবদি ইন্দিয়াখক্তগী নত্তনা মালেমগী ওইনা ফোসীল ফ্যুয়েলদগী মৈ পুথোক্লিবসি হন্থহনবা ঙমগনি হায়না মহাক্না ফোঙদোকখি।