কুকি- নার্কো টেরোরিষ্ট শিংগী এত্তেক্টতা লৈখিদ্রবা অথৌবা ৪ গী নীংশীং খুভম মায়খূম হাংদোকখ্রে

ইম্ফাল দিসেম্বর ১৬: মনিপুরদা মমাঙ চহীগী মে অহুমদগী কুকি- জো নার্কো-টেরোরিষ্ট শিংনা মখোয়গী মথোঙ হুক্তবা দিমান্দ তৌদুনা মীটৈ ফূরূপ্তা ওন্সীন্দুনা লান্দারক্লিবা অসীদগী মীয়ামগী পুন্সি কন্ননবা অমসুং লন-থুম ঙাক্ননবা হোৎনবদা কুকি- টেরোরিষ্ট শিংগী এত্তেক্টতা কদাংবন্দদা থৱায়না পোন্থা পীখ্রবা অথৌবা ৪ গী মফমদা নোল্লুক্না কোক নোন্দুনা ঈকায়খুম্নবা ঊৎখিবগা লোয়ননা মখোয়গী নীংশীং খূভম শাবা লোইরদুনা মায়খূম হাংদোকখ্রে।
ঙরাং কদাংবন্দ দা পাঙথোকখিবা অথৌবা ৪গী নীংশীং খূভম মায়খূম হাংদোকখিবা থৌরম অদূদা সেকমাই কেন্দ্রগী এম এল এসু ওইরিবা মিনিষ্টর হৈখাম দিঙ্গোনা অথোয়বা মীথূংলেন ওইনা শরুক য়াখি। থৌরমদুদা সি সি এস কেগী প্রসিদেন্ট জিটেন্দ্র নিঙোম্বা, হান্না মণিপুর লৈঙাক্কি আই এ এস ওফিসার ওইরম্বা আর কে নিমাই, সেকমাই কেন্দ্রগী জিলা পরিসদ অমসুং পঞ্চায়েটকি মেম্বরশিং, কেন্দ্র অসীগী মনূংদা লৈরিবা পঞ্চায়েটশিংগী মনূং চন্না লৈরিবা ভিল্লেজ ভল্লন্টিয়র ফোর্সকি মেম্বরশিং অমদি লৈখিদ্রবা অথৌবশিংগী ঈমূং-মনূংগী মীওই কয়ানা শরুক য়াখি
লাইরেনকাবী, খূরখুল, ফূম্লৌ, খোঙহাম্পাৎ অমসুং ময়াঙ লাংজিং জি পিগী মনূংচন্না লৈরিবা ভিল্লেজ ভল্লন্টিয়র ফোর্স অমসুং পঞ্চায়েত অথোরিটিশিংনা শীন্দুনা পাঙথোকখিবা অথৌবা ৪গী নীংশীং খূভম মায়খূম হাংদোকখিবা থৌরম অদূদা মিনিষ্টর হৈখাম দিঙ্গোনা হায়, কুকি- জো টেরোরিষ্টশিংনা মথোঙ-মরম খঙদনা মৈতৈদা লান্দারক্লিবা অসিদা চীংগা তাইননা লৈরিবা সেকমাই কেন্দ্রগী সেকমাঈ, খূরখূল, সেঞ্জম চিরাং, কৌত্রুক, কদাংবন্দ, ফয়েংনচিংবদা এত্তেক্ট ঙাইহাক লৈতনা চত্থরকপদগী মীওই কয়া শিহনখ্রে, কয়া অমনা অশোক- অপন য়াওখ্রে। য়ূম-কৈ, লন-থুম কয়ামরুম মৈনা তুম্না থাদোকপিখ্রে। হৌজিক মফমশিং অসীদা ষ্টেট অমসুং সেন্ট্রেল ফোর্স না ভিল্লেজ ভল্লন্টিয়র শিংগা লোয়ননা খুলশিং ঙাক্লি। অথৌবা মরীগী অৱাবা নংহৌরবা ঈমূং-মনূংগী অৱাবা নুঙাইতবদসু মহাক অমদি মীয়াম্না মপূঙ ফানা শরুক য়ারি হায়খি।
হৌজিক মীয়াম্না মায়োক্ন রিবা হীংশাগী ঈরাঙ অসী অথূবা মতমদা লোইশিনবা ঙম্ননবা সেন্টর অমসুং ষ্টেট লৈঙাক্না কন্না হোৎনরি। মতম খরদং মীয়াম পূন্না অৱাবা খাঙমীন্নখিসি হায়খি।