ন্যু দিল্লিদা পাঙথোকখিবা মীফম অদূদা চিফ মিনিষ্টর য়াওখিদব মরম চাদে: ৱাই জয়কুমার

মনিপুরদা থোক্লিবা চহী অমা মখায় শুরবা হীংশাগী ঈরাং অসী লোইশিন্ননবগী পান্দমদা য়ুনিয়ন হোম মিনিষ্টর অমিট শাহানা কৌরকপদগী ফূরূপ অহূমগী মিনিষ্টর এম এল এ শিং শরুক য়াদুনা পাঙথোকখি হায়রিবা মীফম অদূ হীংশাগী ঈরাং অসী লোইশিন্ননবা শীনখিবা মান্দে মরমদি অমিট শাহানা মীফম কৌরম্লগা মশামক য়াওখিদে, মদূগী মহুৎ লোক সভাগী এম পি অমা ওইরিবা বিজেপিগী নোরথ ঈষ্ট ইন- চার্জ শম্বিট পট্রাদা উশিন তৌথোক্লগা কান্নররোইদবা, মীয়াম্না তানীংদ্রবা অরিবা ৱাফম হায়বদি খৎনরিবা হাৎন-শুনরিবা অসী খামজিন্ননবা হোৎনমিন্নবা হায়না য়ানরে হায়না মীয়ামদা অপঙবা শীরগা মীফমদুগী ইপিসোদ লোইশিনখ্রে হায়না এন পি পিগী জয়কুমারনা ফোঙদোকখ্রে।

লৈঙাক্কি এক্স-চেক্করদগী শেল কাইথোক্লগা দিল্লি য়েংননবা কোয়বা চৎলুবগা চপ মান্নৈ হায়না নেস্নেল পিপলস পার্টি (এন পি পি) গী নেস্নেল ভাইস প্রসিদেন্ট ওইনা লৈরিবা য়ূম্নাম জয়কুমারনা ফোঙদোকখিবনি। পাউমী খরগা অখন্ননা উনখিবা অমদা মহাক্না ৱাফম অসী ফোঙদোরকখিবনি। ন্যু দিল্লিদা পাঙথোকখিবা মীফম অদূ হীংশাগী ঈরাং অসী লোইশিন্ননবগী পান্দমদা পাঙথোকখিবা ওইরবদি প্রাইম মিনিষ্টরনা প্রিসাইদ তৌফম থোকপনি। মদূ নত্রবফাওবদা য়ুনিয়ন হোম মিনিষ্টর অমিট শাহানা প্রিসাইদ তৌফম থোকপনি। মদুদি নত্তনা শম্বিট পট্রাদা উশিন তৌথোক্লগা থমজিনখি। চিফ মিনিষ্টর নোংথোম্বম বিরেনসু য়াওফম থোকপনি অদুবু য়াওখিদে হায়না মহাক্না ফোঙদোকখি।

ঈরাং অসী লোইশিন্ননবগী পান্দমদা তশেংনা সেন্টরনা পূকচেল শেংনা থবক পায়খৎপা ওইরবদি এন পি পিগী মীহুৎ কাইশি, জাংহেমলুংসু বার্টোন তৌদুনা য়াওহনফম থোকপনি, তৌরকখিদে। কংগ্রেস পার্টিগী মীহূৎশিংসু বার্টোন তৌরকখিদে। মরম অদূনা হন্দক্কি মীফমদু মনিপুরগী মীয়াম্বু করেম্নবা, উশিত্তবা ঊৎপনি হায়না জয়কুমারনা ফোঙদোকখি।